اشعارخواطر

أجمل أشعار وقصائد عمرو حسن

الشاعر عمرو حسن مواليد 17/8/87 بحي العصافرة الاسكندرية متخرج من كلية التجارة بجامعة قناة السويس لعام 2010 وبكتب الشعر من 2004 الجوائز التى حصل عليها – جائزة ساقية الصاوي ( أفضل شاعر 2010 ) – جائزة مجلة الثقافة الجديدة ( أفضل شاعر 2010 ) – جائزة المركزية 2008 – ذهبية الجامعات 2009 ( أفضل شاعر ) – درع جامعة حلوان 2009 ( أفضل شاعر ) الكتب المفضلة له علي ناصية الشاعر . – المهنة بارقص . – العزلة نص الونس . – من هنا للشعر . – الفراشات . – مصر الجديدة . – ديوان ناس كافيه . – سيلفى .

نبذه عن عمرو على لسانه

كنت طالب ف مدرسة الفاروق عمر الإعدادية بالإسماعيلية تقريباً سنة ٩٩ وكان بيدرسلي عربي أستاذ اسمه احمد غنيم الله يرعاه حياً او راحلاً، طلب مننا موضوع تعبير عن حرب أكتوبر كل زميلي كتبوه بصيغة محددة وقوالب محفوظة وبشكل مقالي معتمد على الخبرية، الا انا كتبت صور غير حقيقية بتوصيف المعركة من زاوية إنسانية غابت عن كل زميلي وسردت قصص مجازية تسرد الحرب من بيت مصري، ثاني يوم جالي استدعاء ولي أمر ماع رفش ليه، كلمت ابويا ف البيت وجه المدرسة، أستاذ غنيم قابله ف مكتب المدير وانا موجود وقاله موضوع التعبير ده بخط ابنك! قاله ايوه، قاله حد كتبهله ولا هو اللي كتبه؟ ابويا قاله لأ هو اللي كتبه، أستاذ غنيم كتبلي بعد الدرجة النهائية على جنب موضوع التعبير وبقلم احمر، “موضوع أدبي ممتاز وأتمنى لك كل التوفيق” وقال لابويا خلوا بالكم منه.

عدى على المشهد ده عشرين سنة، وفضلت اكتب من ساعتها بسبب شهادة مدرس العربي وتصديق ابويا، النهاردة بقى عندي ٣٣ سنة ومن اكتر الشعراء شهرة في العالم العربي بسبب جملة كتبتلي من عشرين سنة
شكراً لكل من حب وصدق ودعّم وفهِّم وقالي قول يا درويش،
شكراً لكل الأشياء الجميلة اللي بتواجه القبح قدر الاستطاعة
وشكراً ليكم بعد ربنا
على كل شيء.

قصيدة اللي بيحبك يصونك

اللي بيحبك يصونك
يبقي نور ساكن عيونك
اللي بيحبك يهاودك
لما يظهر فيك جنونك
يبقي فرحك لما تحزن
لما كل الناس تخونك
اللي بيحبك يضمك
ولما تتكسر يلمك
تبقي حاسس أنه دمك
اللي بيحبك يشيلك
تندهله علطول يجيلك
يبقي عطشان من سبيلك
ممكنه من مستحيلك
تلقى دمعه سلسبيلك
يمسح الأحزان بكُمك
اللي بيحبك يحاوطك
يبقي مستحمل قساوتك
يبقي فاهم أمنياتك
إيه بتتمناه ف حياتك
جاف يقاوم استيكاتك
حضنه يشبه حضن امك
اللي بيحبك مرايتك
انت غايته وهو غايتك
يبقي حتة من حكايتك
يعني فاهمك من كلامك
من ملامحك وابتسامك
واما تكتر فيك الامك
يبقي متغرب بدونك
اللي بيحبك يشِّدك
لما تبقي وحيد ضعيف
يبقي اجمل حاجة عايشة
لما كل الكون سخيف
شخص لجل عيونك أنت
مستعد يعيش كفيف
شوف بقا مين اللي حبك
مين بيرهن عمره جنبك
أن لقيته بجد حبك
قول له كان الله ف عونك.

 قصيدة جوابي ده الأخير ليكي

جوابي ده الأخير ليكي

يامعاليكي
ياست الحسن
ياسبب الحزن والعلة
ياشجرة حسبتها ضله وطلعت نار
بداية القول : مساء الفل ع الأزهار على خدودك
مابنجرّحش
ومابنسمحش حد يقول كلام عنك
لذلك ثم أما بعد ،
أنا الطفل اللي كان ف عنيكي متشعبط
يشوفك روحه تتلخبط
وقلبه ابن الحرام يضعف ويستعبط
كإنك زار وانا الدرويش
كإنك غار وانا الحرافيش
كإنك كنتي قرش حشيش
دخل رئتيني وملاني
كإنك دار وانا اللي ماليش
سوا الدار اللي لمّاني
بغض الجرح مين خان مين
ومين قصّر مع التاني
وغض الطرفْ عن اسمك
وطعم خروجه ف لساني
أنا مليّت من القصة ومن لعبة خلاص لسه
لقيتك غيمة ف حياتي حسبتك مطره قمت جريت
وفجأة لقيت مفيش غير ليل
سحابة ضلمة كنتي انتي
اشوفك ف الوجع بنتي
واحسك ارضي وسفينتي
وشمس بتملا ليلي شروق
مافيش كام يوم لقيتني بافوق
واشوف القاتل الفعلي
لقيتك أرض ماتضمش سوى المطاريد
وانا عيل بيفتح إيد يشوفك خط على كفه
عنيا عيال اذا بصيتي يتدّفوا
حسبتك أم بتدوّر رحى الأحضان على عيالها
لقيتك ماسكة كاتم صوت
رصاصك فات وجع جواي
وهو ياحلوة يعني الموت
بيفرق شكله كان ازاي
وهو الجرح للستات ومش لينا ؟
ما فيه رجالة بتعيّط
وفيه رجالة بتفكّر ف عز الليل ف ناس باعوا
وفيه راجل اذا فات ف المحيط وجعه مابيساعه
وفيه عناوين بتتلخبط
وفيه بكره بيتشخبط
وفيه أطفال مايتولدوش ف مستقبل ماجاش قدام
وفيه زفة مابتقومشي
وفيه فرحة مابتدومشي
وفيه نغزة ف صميم الروح
ما دام ف القصة فيه دابح
أكيد ف القصة فيه مدبوح
ولو كان القتيل راجل
ف دمه بيبقي مش بالسهل
خسرتي معاه وجود الأهل
خسرتي الضهر والضمه
خسرتي الجمع واللمة
وبكره هتندمي لما
تحسي البرد من دونه
ياريتك شوفتي ف عيونه دموع الأب
أنا الشخص اللي كله ذنوب
لكن مليان حاجات تتحب

عملت حاجات لأول مرة بعملها
وكِملِت أغنيات بيكي
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب
عكستي المشهد المكتوب
ماكانش الفيلم دي نهايته
كده الكاتب لعب ف النص
وفيه لزق ف حياتي وقص
وفيه تركيب لناس تانية
فيه مشهد خارجي مش محطوط
أنا وانتي
ومطرة بتغسل الشارع من الاحزان
حضنتيني زمان ومكان
وقولتيلي مافيش غيرك
نزلت ف لحظة على ركبي وانا ف ايديا كام وردة
ضحكتيلي
وطبطبتيلي علي خدي
كانك كنتي بتعدي على قلبي بروح حافية
مسكت الدمعه بالعافيه وضميتك ف عز البرد
لقيتني الفيلم بالكامل مافيش ولا لقطة ماسك ورد
طلع فيه حاجات بتتصور
بتتقصقص من المونتاج
وأول ما المطر لمسك
لقيتك دوبتي ف المكياج
عروسة حلاوة أو صورة
ملامح فازة مكسورة ف اخر جزء ف الذكرى
خسارة تكمّلي بكره
يا نور ساطع بيعمي العين ما بينوّرش
انا هافضل كده عيّل ومابيكبرش
وبكره يجوز تقابليني ف أي مكان
هاشوفك وقتها دخان
بقوة ست هاعشقها ف زمان تاني
ولمسة طفل يشبهني مايشبهكيش
انا جوايا كام ميّت وحابب اعيش
لا هاتحوّل
ولا هارجع من الأول
ولا هاكتب عشانك شعر
هبيعك دون نظر للسعر
مكانك وردة ماسقيتهاش ف دبلت من خريف موجوع
دموعي رصيد باحوش فيه لناس مستاهلة مني دموع
وحلمي معاكي م الأول
خطيئة لابد اكفّرها
رميتك طفل ببراءته
ندم على حاجة وكسرها
يا أسوأ حلو كان فيّا
يا أطيب شر ف النية
كسبت حاجات تسيء ليا
وجه الوقت اللي أنا أخسرها .

قصيدة هيبتا

نبدأ منين؟
من صدفة في الشارع
أو شارع الصدفة
أو أي شيء مدهش بيتم بين اتنين
من التقاء العين
أو من حاجات تانية
تبدأ من الدنيا
على اعتبارها كمين
بين إحنا والتانيين
ويبدأ التدوين
من أول السيرة

الصدفة تجمعنا
زي اللي خارج من كافيه بالليل
يخبط في كتف مهندسة بترول
أو عاملة في مصنع
تسقط ما بينهم أغنيات صدفة
لا يوطوا يجنوها ولا يسيبوها تكُف
– تكبر هنا شجرة مجهولة المصدر وشكلها مختلف –
تنمو بفعل الوقت
وتصير مخازن للطيور والقش
البذرة صدفة والفروع علاقات
بالتالي يا حضرات
لا تُهملوا الخطوات أو تمشوا مش شايفين
هتدوسوا على علاقات وبواقي بني آدمين
فتوخوا بعض الحذر
أو امعنوا في النظر
جايز تشوفوا اتنين واقع مابينهم شيء
هيكون لبكرة طريق
يشبه طريق بكرة
واتأملوا الحكايات
اتأملوا الحكايات
في الدنيا ياما حاجات أكبر من الرؤية
فبنمشي مانشوفهاش
شجرة هنا بتكبر بين حد جه وماراحش
وحد راح وماجاش،،

جديد عمرو حسن

قصيدة بعد السكران مايفوق

بعد السكران مايفوق
بعد السكران مايفوق
وانتي بتقولي لصحابك
قد ايه انا شخص قاسي
وطبعي في غاية السئالة
ابقي قولي ان انا سبب البطالة
سبب انخفاض منسوب مياه النيل
خفة الدم اللي فيكي مهوّنه دمي التقيل
وان ذوقي كله ذوقك
واني بتمرمغ ف شوقك بس جاحد
اشتميني تعلي مني
ذّمي سيرتي هتمدحيني
خرّجي الطبع اللي فيكي وفرحيني
دول كاسين منقوعهم ايه اللي يجيبوني
ارمي عمري بين ايديكي وأقول يادوب
خمرة ايه اللي تاخدني لواحدة بتكسّر قلوب
كنت بستحمل مصايب مش ببيّن
عشت أقول ع الغلطه وارده
كنت اشوف الشوكة وردة
واوصف القاسي انه هيّن
 
—————–
 
دلوقتي باشوف طيفِك أوضح
وبلاحظ شرخ ما بيننا كبير
كل اللي اتقال عنك مش صح
انتي اوحش م اللي اتقال بكتير.
 
———
 
 
انت كان لك ماضي قبلي
وعرفت غيري وحبيته
والماضي ده جاني وقاللي
واداك حياته وادّيته
وعشان كده كان لازم افكّر
قبل ما احبك اكتر واكتر
لو حبك الماضي صحي
وتلاقي روحك بين حبيبين
هيبقى فين انا مطرحي؟
وساعتها اروح من جرحك فين!
سامحني.
 
————
 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى