اجمل اشعار محمد إبراهيم

محمد ابراهيم .. مواليد المحلة الكبرى 1992 .. تخرجت من تجارة انجلش .. قام بتأليف 5 كتب ومن اهم اعماله فلوماستر أبيض 2014 – شعر الحزن البعيد الهادي 2015 – شعر زي الأفلام 2016 – شعر مطلوب حبيب 2016 – أدب اعترافات لما كنا 2017 – شعر كتبت العديد من الأغاني المهمة .. ومن اهتمامات الشاعر محمد ابراهيم القراءة والتكنولوجيا والعاب البلايستيشن

اجمل اشعار محمد ابراهيم

اشعار محمد ابراهيم فلوماستر أبيض

“وطلعت لفوق جدا جداا ..
صليت وكإنى بودعكوا ..
معلش كلامى هيوجعكوا ..
فـ إقروه للآخر لو حابيين ..
كلنا مساكين ..
أموات عايشين أو بين لـ إتنين ..
انا كنت مفكر وانا عيل إن الأيام أفلام سيما ..
ورضيت بالواقع لما فهمت ..
حكمة ربنا فـ التقسيمه ..
كلنا جايين الدنيا بنقص
وبحاجه زياده عن الباقيين ..
ويارب إزاى .. وانا مش بسأل ..
ليه حُكمه فـ كل اللى بيحصل ..
سبحانك قسّمت الأرزاق ..
أشكال أنواع ..
ولغات أسماء ..
وشوارع فيها بيوت وحارات ..
وجوامع وكنايس وبارات ..
لا بتمنع رزقك عن كافر ..
ولا سايب مؤمن فـ الضيقه ..
ربنا موجود والنبى موجود ..

بقالها كتير ..
مبتنامشى على صوته
ولا مضايقه من غيبته
ولو سألوها عنه الناس
فتضحك ضحكه موجوعه
وتنطق بعدها ” سبته”
بقالها كتير ..
مبتبينش إحساسها
ولا بتحكى لـ أصحابها
ولا بتندم عشان سابها
بقالها كتير ..
من الآخر مبتحسش بولا حاجه
ولا بتبكى على ولا شيئ
ولا بتحن للصدفه اللى تجمعهم
فـ اى طريق ..
الجرح علّم فيها آه ..
لكنه علمّها
ان اللى يوجعها
ملهوش مكان ” فيها ”
ولا ينفع حبيب ليها
ولا هيا راح تقبل تكون تانى
حبيبته !

كتبت وراكى بالملى
كلامك وانت بتملى
بحبك حب متحبك
كانه حجاب ومعمول لى
فبكتب شعر بالفصحى
بفرحه طفل فى الفسحه
وفرحه ذنب بالغفران
وعابد بعد ما يصلى
عشان الفلب كان نادر
محبه لقلبك النادر
هويت والقلب وفى الندر
وقمت كتتير اصلى الفجر
وادعى بحرقه ليله القدر
عشان الباب ما بنا يزول
وينزل دمعى منى نزول
وتغرق فى الدموع كفى
ولا شافع ولا مكفى
والم الدعوه ع الدعوه
وادعى كتييير وابقى لحوح
وقلبى يقول ماليش دعوه
عيزها يا رب لو بجروح
عايزها تيجى بالدمعه
وبالاوجاع والاها
ودعوه فيها بتوسل بال البيت وجاه طه
ماهى السهله دى لو جتلى
اكيد بالسهل يوم هتروح
فليه ديما ما بينا بعاد
وليه الوقت يرمينا
لاخر بعد فى الابعاد
واستناكى يوم تيجى
ومتجيش برده اى معاد
وليه لو كنا من العشاق
ده يحصلك ويحصلى
دانا عاشق كتبت وراكى بالملى
كلامك وانت بتملى
بحبك حب متجبك
كانه حجاب ومعمولى

شكرا = ان انا زعلان

شكرا = ان انا زعلان
وإنك غلطان ..
لازم تستنى ونتعاتب
انما لو حابب يومها تقول !
عفوا = اتحرق بجاز . .
ونكمل شغل الألغاز
ونصهين على وجع الاحساس
راح ترجع تسأل يوم مالك
وهقول انا عادى عشان
تسكت ..
وترد خلاص!

عارف سعات بحتاج افضفضلك

عارف سعات بحتاج افضفضلك اوى وانت سعات أكتر متسمعنيش فطبيعى جدا بعدها تسألنى مالك فيكى إيه فأقول مفيش .. فيه حجات كتيره إن متقالتش فـ وقتها لو تيجى تسأل بعدها مبتتحكيش .. مشغول بإيه وانت اللى قولت إنى الحياه بالنسبه ليك … وحقيقى مش قادره أفهمك أو أحس بيك فاكر زمان فيه كلام كتير قولناه فـ نفس الوقت و فـ قربى ليك قد البعاد إشتقت وأستنى يجمع بينا أى معاد ليه إهتمامك بيّا قل وبالسكوت مين إستفاد ؟! ليه المعامله اتغيرت فجأه لأسوء وإن جيت تقولى بعشقك مقدرش أصدق أصل المحبه مش غنا ولا كلمتين يعنى ! أنا محتاجه أفضفضلك فمن فضلك ياريت تهتم تسمعنى عشان فيه الف ميت حاجه بسببك غاويه توجعنى‏
عارف سعات بحتاج افضفضلك
اوى وانت سعات أكتر متسمعنيش
فطبيعى جدا بعدها تسألنى مالك
فيكى إيه فأقول مفيش ..
فيه حجات كتيره إن متقالتش
فـ وقتها لو تيجى تسأل بعدها
مبتتحكيش ..
مشغول بإيه وانت اللى قولت إنى
الحياه بالنسبه ليك
… وحقيقى مش قادره أفهمك
أو أحس بيك
فاكر زمان فيه كلام كتير
قولناه فـ نفس الوقت
و فـ قربى ليك قد البعاد إشتقت
وأستنى يجمع بينا أى معاد
ليه إهتمامك بيّا قل وبالسكوت
مين إستفاد ؟!
ليه المعامله اتغيرت فجأه لأسوء
وإن جيت تقولى بعشقك
مقدرش أصدق
أصل المحبه مش غنا ولا كلمتين
يعنى !
أنا محتاجه أفضفضلك فمن فضلك
ياريت تهتم تسمعنى
عشان فيه الف ميت حاجه
بسببك غاويه توجعنى

هيقولوا عليك إرهابى

هيقولوا عليك إرهابى
متطرف أو إخوان
جايب كام جون فـ حياته ؟!
قال يعنى الكوره اجوان
وهتلقى تاريخك كله…
ممسوح فجأه بأستيكه
ويجوز يتقال فـ الزحمه
متمول من امريكا ..
و يجوز نلاقيلك صفحه
” كلنا جنب ابو تريكه ”
ومؤيد جنب معارض
وفلان يشتم فـ فلان
مهو فـ الاوقات دى
حقيقى النفسيات بتبان

لكن ولأول مره اكتب
و انا قلبى مدمع
واحس الشعب ده تانى
قادر فعلا يتجمّع
ويشكل درع حمايه
حوالين قيمة ” انسان ”
بشكرهم جداً جداً
جمايلهم نازله ترفّ
بيصادروا فلوسك و انت
الناس حواليك بتلف
قيمتك فـ الناس يا تريكه
حُب الشياطين الحمر
وهتاف التالته يمين
أبيض يا تشيرت العمر

قصيدة متعتذريش

متعتذريش .. عشان و الله مش فاهمك
و مش قادر أحدد موقفك بالظبط ..
براجع كل تفصيله ..
مفيش فـ القصه حلقة ربط ..
مفيش حبكه .. مفيش ربكه
مفيش فـ القصه دمعة عين
و رعشة إيد .. و قبضة قلب أو قهره
أكيد فيه حاجه مش ظاهره

تعالى نبص عـ المشهد ..
نراجعه من الألف للياء ..
نشوف مين فينا كان مشتاق
و مين قصر .. ومين إهتم
و مين نايم بكل برود
ومين سهران يعيط دم

أكيد حبك مهم .. أكيد
لكن يعنى كرامتى أهم

فـ كان من حقى أقول همشى ..
و أقول سبتك لكل الناس
و انا كداب ..
صحيح سبتك انا لكن
انا المتساب ..

انا المتساب بأفعالك ..
و إهمالك ..
و إحساسى ان فى حياتك
مجرد طيف ..
و ساكن جوا منك ضيف
لا ليا حقوق ولا كرامه
و عايش بس من غير صوت
وطول الوقت بتذلل
و بشحت كلمتين حلوين
فـ آخر اليوم ..
عشان أعرف انام مبسوط

بقول سبتك لكل الناس و برضى غرورى
وسطيهم .. و انا جوايا نار قايده
” مفيش فايده ” .. بكابر قد ما بكابر
و قلبى من الحنين مفضوح
قريب وغريب .. يبص فـ عينى
فيشوفك بكل وضوح ..

و لسه انا تحت تأثيرك ..
ومش شايف بنات غيرك
لكن أصبحت مبشوفكيش

متعتذريش ..